Gjermania i dhuron 200 palë këpucë RENEA-s, reagon ashpër gazetari: Një fije turpi a nuk keni

Gazetari Mentor Kikia ka reaguar ashpër pas dhurimit të 200 këpucëve nga policia gjermane për RENEA-n.

Përmes një postimi në rrjetet sociale, Kikia shkruan se kur u pranuam në NATO, ushtarët merrnin atletet e tyre me vete pasi nuk kishim dhe tani që duam të hyjmë në BE na i dhurojnë.

Sipas tij ndihma nuk ka asgjë të keqe, por për një repart policie duheshin dhuruar paisje teknike e teknologjike e jo këpucë.

Postimi i plotë:

Po një fije turpi a nuk keni?

Kur ne u pranuam në NATO, ushtarët tanë shkonin në repart dhe merrnin atlete me vete nga shtëpia, pasi nuk kishin këpucë.

Kur ne duam të hyjnë në BE, serish “opingat” na i sjellin ndihmë.

Në fakt të pranosh ndihma nuk ka gjë të keqe. Por një repart policie, mund të pranojnë ndihmë asistencën e specialistëve që nuk e kemi dot, apo paisje teknike e teknologjike, apo armatime, që sërish nuk i kemi e nuk i prodhojmë dot.

Por jo këpucë.

Jo dreqin, se është dhe e turpshme.

Këpucë na sillnin edhe qëmoti, kur luftonim kundër gjermanëve, na i hidhnin anglezët me parashutë. Këpucë na sjellin edhe gjermanët sot, kur s’luftojmë me askënd.

A jemi vërtet kaq të mbaruar e të grisur, sa as këpucë për ushtarët e policët nuk blejmë, apo nuk bëjmë dot?